وعلى الصعيد المادي، فالراتب قليل وبسرعة بطير، وأحيانا موظفة معها توجيهي أو سكرتيرة بتجيب راتب أضعاف راتبي..

وعلى الصعيد الشخصي، فالبنات حوالي بيتزوجو وأنا لسه قاعده، والإنسان اللي حبيتو وشفت الدنيا فيه تركني، والعرسان مش على قفا من يشيل!

فشو الحل؟

الحل.. سيجارة.. أروح أشتري علبة سجاير، وأطول السيجارة، وأشعل السيجارة وأسحب نفس.. ويا عيني على هالنفس.. وأنفخ الدخان.. ويا سلام، مشاكلي خفت وعم تتطاير متل هالدخان.. أكيد مشاكلي حتخف.. مع هالنفس.. مشاكلي حتخف..مش مهم مديري ولا الموظفين ولا الراتب ولا حتى الزواج.. مع هالنفس كل شي حيهون.. أكيد رح يهون.. أنا هيك بشوفهم بالمسلسلات وبالأفلام.. عندك مشكلة؟ زعلان؟ معصب؟ إذا، اشرب هالسيجارة وأكيد رح تنسى..

بس رنا استني شوي.. مش الدخان حرام؟ وربنا مش رح يرضى عنك؟ وريحة الدخان مقرفة؟ وحيصيرو شفايفك سود، واسنانك صفر؟ وحتجيبي لحالك أمراض، إشي أمراض رئة وإشي سرطان؟ وبعدين حتزيدي مصاريفك؟ والا الناس، شوفي كيف رح يطلعوا عليك والا شو رح يحكوا عنك؟ حيشوفوك بنت مو منيحة؟

يعني بس أشرب سيجارة صرت متل اللي صابه جرح في إيدو، ووجعه كتير، فشو عمل؟ جاب السكينة وعمل جرح أكبر برجله، وبالتالي نسي الجرح الأولاني، بس من خلال شو؟ من خلال جرح تاني أكبر!

فحال الدنيا أنها مليئة بالمتاعب، فحين تواجهك المصاعب استعن بالله، وراجع قصة سيدنا يوسف ويعقوب وانظر إلى صبرهم وصبر الأنبياء، وانظر إلى من هو مبتلى أكثر منك، وتذكر أن مع العسر يسرا، ومهما طال الليل فسيطلع فجر جديد يبدد الظلام وينهي المتاعب.. والله يحب الصابرين..